25 سؤال غير مباشر للطفل تسأليه عن المدرسة

children discussion

25 سؤال غير مباشر للطفل تسأليه عن المدرسة

كم مرة بتسألي اولادك كل يوم “عملت ايه في المدرسة؟” “يومك كان كويس؟” و طبعاً اغلب الوقت بيكون الرد “كويس” “تمام الحمدلله” و بيسكوتوا.

طبعا اي ام مش بتكون عايزة الاجابة دي، بتكون عايزة اجابة فيها تفاصيل اكتر عن اليوم في المدرسة عن الاصحاب اللي اتعرف(ت) عليهم، الانشطة اللي المدرسة بتعملها …. وهكذا.
علشان تقدر تكون فكرة عن المدرسة مناسبة ولا لأ و غير كده تقدر تعرف ابنها او بنتها بيفكروا ازاي و تقدر توجههم في الصح.

و لو الابن او الابنة مقالش من نفسه كل اللي حصل في المدرسة، الام مش هتعرف و حتى لو عرفت، الموضوع هيبقى صعب و ممكن الطفل يحس ان الام بتتجسس عليه فالامور هتتعقد اكتر.

في المقال ده هنحاول نعرض شوية اسئلة غير مباشرة للأم تسأل بيها اولادها عن يومهم في المدرسة.

  • ايه احسن حاجة حصلتلك النهاردة في المدرسة ؟
  • ايه الموقف اللي ضحكك في المدرسة او الفصل ؟
  • عايز تقعد جنب مين في الفصل ؟ و مين لأ ؟
  • اكتر مكان بتحبه في المدرسة ؟
  • اغرب حاجة سمعتها النهاردة في المدرسة ؟
  • لو انا كلمت المُدرسة بتاعتك، تفتكر هتقول ايه عليك ؟ و ليه ؟
  • ساعدت مين النهاردة و ازاي ؟
  • حد ساعدك في حاجة في المدرسة ؟
  • اتعلمت ايه النهاردة في المدرسة ؟
  • في حاجة ضيقتك في المدرسة النهاردة ؟ و طيب ايه اللي فرحك ؟
  • بتحب تلعب مع مين في المدرسة ؟
  • مين اللي لسه ملعبتش معاه و نفسك تلعب معاه ؟
  • مين اللي مش عايز تلعب معاه خالص ؟
  • ايه اكتر مادة بتحب تذاكرها اكتر ؟
  • ايه الماده اللي عايز تحسن نفسك فيها ؟
  • ايه اكتر ماده مش بتحبها ؟
  • مين اكتر واحد صاحبك ؟
  • مين اللي عايز تتعرف ليه ؟
  • ايه اكتر رياضة بتحب تلعبها في المدرسة ؟
  • ايه الاكل اللي عجبك في الساندويتشات ؟
  • لو بقيت المُدرس ليوم واحد هتعمل ايه ؟
  • لو جت سفينة فضائية، عايزها تاخد مين ؟

ملحوظات:

اختاري الوقت و المكان المناسبين

بلاش تسألي ابنك او بنتك و انتي مش مركزة معاهم اختاري الاوقات المناسبة علشان الطفل يحس انك مهتمة باللي بيقوله فعلًا مش مجرد تقضية واجب و تريحي ضميرك و علشان يكبر على انه يحكي معاكي لكن لو مش مهتمة الطفل مش هيتعب نفسه انه يحكي سواء كان عن المدرسة او اصحابه او حياته.

بلاش تقطعيهم

سيبي الطفل يكمل كلامه للاخر و بعد ما يخلص قولي اللي انتي عايزاه، عوديهم على كده

اعرفي تفاصيل اكتر

ببساطة كل لما يقولك حاجة خليكي يحكيها بالتفصيل، لو الطفل حب يختصر كلامه متديلوش فرصة قوليله عايزة اعرف اكتر

اسأليه حس بأيه؟

لما الطفل يحكي تجربة معينة اسأليه حس بأيه ؟ شعوره كان وقتها ايه ؟ و اخيرا اشكريهم و عبري عن سعادتك في الكلام معاهم و انه كان حوار ممتع و انك استمتعتي

و دي كانت شوية اسألة غير مباشرة تقدر الام تسألهم لاولادها و بيدأوا يحكُلها عن يومهم في المدرسة و يتعودوا على الكلام و الحوار يبقى روتين يتعودوا عليه و يفضل لو الاب يدخل و يحاول يخصص وقت لاولاده في نص اليوم و حتى لو مشغول يبقى يوم في الاسبوع يتابع اولاده.

قبل ما تمشي لو بتقدم لاولادك للمدرسة و محتار تختار ايه او مش عارف المدارس في مصر كويس. 
ادخل على الموقع ده EasySchools
و تابعنا على السوشيال ميديا علشان تعرف كل جديد عن المدارس.

Summary
25 سؤال غير مباشر للطفل تسأليه عن المدرسة
Article Name
25 سؤال غير مباشر للطفل تسأليه عن المدرسة
Description
كم مرة بتسألي اولادك كل يوم "عملت ايه في المدرسة؟" "يومك كان كويس؟" و طبعاً اغلب الوقت بيكون الرد "كويس" "تمام الحمدلله" و بيسكوتوا، اي ام مش بتكون عايزة الاجابة دي، بتكون عايزة اجابة فيها تفاصيل اكتر عن اليوم في المدرسة عن الاصحاب اللي اتعرف(ت) عليهم، الانشطة اللي المدرسة بتعملها.
Author
Publisher Name
EasySchools
Publisher Logo

You May Also Like

About the Author: admin

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *